ජීවිතය කියන්නේ හරි පුදුමාකාර දෙයක්. සමහර වෙලාවට මරණ මංචකයේ ඉන්න මිනිහෙකුට තියෙන්නේ හරිම පුංචි, ඒත් මුළු ලෝකයක් තරම් වටින එකම එක බලාපොරොත්තුවක් විතරයි.
පහුගිය දවස්වල සමාජ මාධ්ය පුරාම කතාබහට ලක්වුණු ගයාන් මුණසිංහගේ කතාවත් අන්න ඒ වගේ මුළු රටේම ඇස්වලට කඳුළු උනපු සංවේදී කතාවක්.
ඒත්... දහස් ගණනක් මිනිස්සු ප්රාර්ථනා කරද්දී, අවාසනාවන්ත විදිහට ඒ එකම එක බලාපොරොත්තුවවත් ඉටු කරගන්න නොලැබීම ගයාන් ඊයේ (04) මෙලොවින් සමුගෙන ගිහින්. මේ බව ප්රවීණ සංගීතවේදී දයාන් විතාරණයන් විසින් ඉතා සංවේගයෙන් යුතුව දැනුම් දීලා තිබුණා. ඔහු ගැන රටටම කිව්වෙත් දයාන් විතාරණ මහත්මයාම තමයි.
ගයාන් පසුගිය කාලය පුරාවටම ප්රතිකාර ලැබුවේ මහරගම අපේක්ෂා රෝහලේ ශාන්ත සෙවණ වාට්ටුවේයි. පසුගිය 26 වැනිදා ප්රවීණ කලාකරුවන් වන දයාන් විතාරණ, ප්රියනාත් රත්නායක සහ සෙව්වන්දි රණතුංග යන මහත්ම මහත්මීන් ඔහුව බලන්න ගිය වෙලාවේ ගයාන් හරි අපූරු, ඒත් හදවත කීරි ගැහෙන ඉල්ලීමක් කළා.
"මීට අවුරුදු 20කට කලින් මගෙන් වෙන් වෙලා, දැන් ඕස්ට්රේලියාවේ ජීවත් වෙන මගේ පරණ පෙම්වතියව එකම එක පාරක් දකින්න ඕනේ..."
ඒ තමයි මරණය පෙනි පෙනී හිටපු ඒ අසරණ පෙම්වතාගේ අවසන් බලාපොරොත්තුව වුණේ. ඔවුන් දෙදෙනා මීට දශක දෙකකට කලින් ඉතාමත් සාමකාමීව වෙන් වුණු බවත් ඔහු එහිදී මතක් කරලා තිබුණා.
තමන්ගේ ප්රාර්ථනය වචනවලට පෙරළපු ගයාන්, එදා ඒ කලාකරුවන්ගෙන් ගීත දෙකක් අහන්නත් ආසාවක් දක්වලා තිබුණා.
නිරංජලා සරෝජිනී ගායනා කරන 'ඔබ දැක ගැනීමෙන්' ගීතය සෙව්වන්දි රණතුංගගේ හඬින් අහන්නත්,
දයාන් විතාරණයන්ගේ 'සිත්තම් කරමින්' ගීතය ඔහුගේම හඬින් අහන්නත් ගයාන් එදා ගොඩක් කැමැත්තෙන් හිටියා.
ගයාන්ගේ මේ සංවේදී ඉල්ලීම දයාන් විතාරණයන් මුහුණුපොතේ දැම්මට පස්සේ, මුළු රටම වගේ එකතු වෙලා මේ පෝස්ට් එක ෂෙයාර් කළේ කොහොමහරි මේ අහිංසකයාගේ අන්තිම කැමැත්ත ඉටු කරලා දෙන්නයි.
ඒත්... ඒ කිසිම දෙයකට ඉඩක් නොතියා හිතුවක්කාර මරණය ගයාන්ව හොයාගෙන ඇවිත්. අඩුම තරමේ තමන් පණ වගේ ආදරය කරපු ඇගේ රූපය තියා, එක වචනයක්... එක කටහඬක්වත් අහන්න නොලැබීම ගයාන් මරු තුරුලට ගියේ ඒ ආදරේ හදවතේම හිරකරගෙනයි.
එකම එක සෙනෙහෙබර ප්රාර්ථනයක් හිතේ තියාගෙන ජීවිත ගමන අවසන් කළ ගයාන්, ඔබට මේ සංසාරේ කවදාහරි දවසක ඒ ආදරය මුණගැහේවා කියලා කාගේත් එකම ප්රාර්ථනය වනු නොඅනුමානයි.
Comments
Post a Comment